Kingulliqnit

Nick NewberyNick Newbery Nunavunmi nunaqaqhimayuq 1976-mit 2005-mut, ilihaqtiupluni Taluryuaqmi, Pangnirtuumi, Qikiqtaryuami Iqalungnilu. Pulaaqhimayait tamangnik nunallaat Nunavunmi Ukiuqtaqtumiitilluni auyamilu aullauyayuktuq tikittaami ayuqnaqtut nunait aviktuqhimayumi. Piksautait, titirauyait titiraqhimayaillu, Nunavunmut titiraqhimayut, takughauvaqhutik tatqiqhiutinit, titiraaqhanit, piksautinit makpiraanillu Kanatami ahinilu. Havaqatigiplugit Royal Canadian Legion, Katimayiit 168, Iqalungni, makpiraaliuqhimayuq pingahunik ilangi piksaliuqhimayut Kivalliqhiqmi Ukiuqtaqtumi (1995, 1999, 2009). 2005-mi nuliangalu Terry nuuhimayut Nova Scotia-mut, talvani ilihaivaktuq ilihaqpaallivingmi, inungnut unipkaaqpaghuni titiraqpaghunilu Nunavut mighaanut Inuutailniku.

Tamangnik piksaliuqhimayut hapkunani piksaliuqhimayait atuqhugu 35 mm-nik piksaliutinik, atuqhunilu Pentax K1000-mik 1975-mit 1995-mut Canon EOSII-miklu 1995-mit kinguanilu. Piksaliugait ikighilaaqhimayut 3500-nut ahu qaritauyakkut qunngiaqnaqtunik, piksautiminiit malruklu aajjikkutariit piksautit qakuqtauyut qirnariktuuplutik. Inungnik ilittuqhitilluaqpaktut inuuhiiniklu, ilitquhituqhutik, nutaannguqtiqtunit uplumirnitarnilu, piksaliuqhimaplutik aallanit nunallaanit ukiuqtaqtumi. Ilauhimayuq malrungnit puiguqtailinnaqtunit Nunavunmi; atiliqtaugami Nunavunmi Nunataarnikkut Angirutinit 1993-mi Hanayaugamilu Nunavut Iqalungni 1999-mi piksaliuqtiupluni Kavamatkunnut Nunavunmi. Piksautit hapkunani qaritauyanit avighimayut 10-nguplutik atauhiqmi, 9-nguyut ivitaalgit atauhiqtauq qakuqtauplutik qingnariuplutiklu. Tamangnut piksaliuqhimayainit attirahuaqpagait tamangit inuit, humiittaaghait ukiungalu.

Nick ilihaqhimaittuq piksaliurniqmik. Piksaliuqniq aliagiinnaqtaa humilikiaq ahiittunik amihunullu ingilraviupluni, talvanngat hikuminirnit nauttianut, anguniaqtuniklu nutaqqanik ulapqiyuniklu. Mihigivagait aallannguqtut qilamiuqhutik imaalu titirarumaplugit ilitquhiit ahiittut ilitturiyuminaqtut, nunalu unanminaigiplugu inuillu arligiplugit tunngahuktittivaghugulu. Piksautait tamangnik takuttiaqnaittut taapkuatut qaritauyatut piksaliutainit kihimi takupkaqtittiyait ilittuqhitinahuaqhuni Inuit inuuhiinik ukiut 40-nik atuqtillugit ilitquhiit aallannguqpalliapluni.

Amihut piksaliuqhimayut Qikiqtaalungmi aviktuqhimayumi talvuuna hapkua ilittuqhautaunngittut imaalu naunaitkutaunngittuq naatkutigiinnginnamik ilitquhiit Nunavunmiunit. Kihimi piksautauyut inuuhirnik, naunaitkutauyut aullaaqtarviinut innup ukiunik 40-nik. Nunavunmiut piksaliuqtittiyuktaat inmingnik inuuhiiniklu. Aullaqtittinikkut hapkuninnga qaritauyakkuurutinik hailiplugillu piksautit inungnut taimaa quyagiplugit Inuit ikayuqpakkamik aittuyughutiklu ilittuqhitiyumaplunilu ingilraaqnitarnik tutquumayaghait Kavamatkut Nunavunmi.